Президенти Қазоқистон Қосимҷомарт Тоқаев ва ҳамтои чинияш Си Ҷинпин, ки рӯзи 14-уми сентябр бо як сафари давлатӣ вориди Нурсултон шуд, ҳамкориҳои ду кишварро дар бахши нақлиёт, ҳамлу нақл ва саноат баррасӣ карданд.

Ба иттилои сомонаи президенти Қазоқистон, Си Ҷинпин ба Тоқаев гуфтааст, ки Пекин ба равобит бо Нурсултон "таваҷҷуҳи бузург" зоҳир мекунад.

Ӯ ҳамчунин афзудааст, "Чин сарфи назар аз чи гуна тағйир ёфтани вазъи байналмилалӣ Қазоқистонро дар масъалаи ҳимоят аз истиқлолият, соҳибихтиёрӣ ва тамомияти арзӣ" пуштибонӣ карда ва ба дахолати ҳама гуна нерӯҳо ба умури дохилии ин кишвар қотеона мухолифат хоҳад кард.

Президенти Чин дақиқ нагуфтааст, ки кадом неруҳоро дар назар дорад.

Идораи Омбудсмен ва ё ваколатдори ҳуқуқи инсон дар Тоҷикистон аз марги чор кӯдаки хурдсол, ки модарашон онҳоро ба рӯдхона андохт, изҳори нигаронии амиқ карда, аз ҷомеа ва мақомот хостааст, барои муҳофизати кӯдакон тадбирҳои бештар биандешанд.

Дар баёнияи дафтари матбуоти омбудсмен дар бораи фоҷиаи моҳи гузашта дар ноҳияи Фархор, ки дар сомонаи ин ниҳод нашр шуд, омадааст, “ҳодисаи мазкур боиси нигаронии амиқи мақомоти давлатӣ ва аҳли ҷомеа гардида, чораҳои таъхирнопазирро дар самти ҳифзи ҳуқуқ ва таъмини манфиатҳои беҳтарини кӯдакон тақозо менамояд.”

Ваколатдори ҳуқуқи инсон дар Тоҷикистон гуфтааст, бо вуҷуди андешидани тадобир дар бораи ҳимояти кӯдакон “ҳолатҳои алоҳидаи фавт, зӯроварӣ ва табъиз, ки нисбати кӯдакон ба вуқӯъ меоянд, ташвишовар боқӣ мемонад.”

Дар ин баёния ҳамчунин омадааст, “таҳлилу омӯзишҳо нишон медиҳад, ки дар аксар ҳолат ҳуқуқу манфиати кӯдакон аз ҷониби падару модар, дигар парасторони онҳо ва махсусан шахсоне, ки кӯдак ба онҳо меҳр баста, боварӣ дорад вайрон карда мешавад.”

Шаби 29 ба 30-уми июн Мадина Ҳалимова, модари 27-солаи чаҳор тифли хурдсол, ки хурдӣ семоҳа ва бузургӣ 5-сола буд, чаҳор фарзанд ва худашро зоҳиран бо қасди худкушӣ ба рӯдхонаи Яхсу андохтааст.

Чаҳор фарзандаш ғарқ шуда ҷон додаанд, вале худаш зинда монд. Ӯро бо иттиҳоми қатли кӯдаконаш боздошт карданд, вале сабабҳои дақиқи қасди худкушӣ кардани зани ҷавон маълум нест. Ҷасади се тифлашро пайдо кардаанд, ҷустӯҷуи яке дигар идома дорад.

Ваколатдори ҳуқуқи инсон дар Тоҷикистон аз мақомот, падару модарон ва ҷомеа тақозо кардааст, ки барои таъмини муҳити солиму амн барои кӯдакон чора биандешанд ва барои баланд бардоштани маърифати ҳуқуқии аҳолӣ “дар самти ҳифз, тарбия, таълим, назорат ва рушди кӯдакон корҳои фаҳмондадиҳиро тақвият бахшанд.”

Пайвандони як духтари чечен, ки аз хушунати хонаводагӣ ба Гурҷистон фирор карда буд, ӯро дуздида талош карданд ба Русия баранд. Дар ин бора гуруҳи ҳомиёни ҳуқуқи "Маарем" хабар доданд.

Ба гуфтаи ҳомиёни ҳуқуқ, Лаура Авторханова рӯзи 13-уми июл ба кормандони паноҳгоҳ хабар додааст, ки наздиконаш ӯро пайдо кардаанд. Вақте кормандони паноҳгоҳ ба қаҳвахонаи таъиншуда омаданд, Авторханова ҳамроҳ бо хоҳаронаш ва панҷ чечен буд. Ин афрод Лаура Авторхановаро шиканҷа карда, баъдан бо худ бурданд.

Ба гузориши "Маарем", наздиконаш баъди дуздидани Авторханова ӯро ба шуъбаи пулис бурданд, то дар бораи ихтиёран тарк кардани Гурҷистон ариза нависад. Дертар хешовандони духтар шуъбаи пулисро тарк карданд ва баъди пурсиш, кормандони пулис Лаура Авторхановаро ба ҷойи бехатар бурданд.

Пулис таҳқиқ дорад, ки чигуна бо вуҷуди зери муҳофизат қарор доштани Лаура Авторханова, хешовандонаш ба ӯ наздик шуданд.

Дар шаҳри Берлини Олмон як табиберо муҳокима мекунанд, ки дар куштори барқасдонаи 15 муштариаш гунаҳгор мешавад. DPA менависад, табибе, ки бо методи паллиативӣ ё таскинбахш кор мекард, гуноҳи худро эътироф намекунад.

Дар мурофиа бояд назари 150 шоҳид пурсида шавад. Шояд мурофиаи додгоҳӣ то январи соли 2026 идома кунад. Табибро бар асоси шикояти хешовандони 13 қурбонӣ ба ҷавобгарӣ кашидаанд. Исми табиби гумонбар нашр намешавад.

Аз ин пеш Би-би-си бо такя ба хулосаҳои тафтишот навишт, ки барои куштани муштариёнаш ин табиб аз маҷмӯи маҳлули омодашуда аз омехтаи маводи доруворе истифода мекард ва дар баъзе ҳолатҳо барои пӯшонидани изи ҷиноят хонаҳои беморонро оташ мезад.

Дар фосилаи солҳои 2021 то 2024 ҳадди аққал 12 зан ва се марди бемор қурбонии ин табиб шудаанд. Ин шахсони 25 то 94-сола ҳама дучори бемориҳои табобатнашаванда ва марговар буданд ва бо ҳамин сабаб ба табиби таскинбахш муроҷиат карданд.

Додситонӣ маълум кардааст, ки табиб бидуни огаҳӣ ва ризоияти беморон ба хуни онҳо доруҳои дардкуше ворид мекард, ин дору мушакҳоро фалаҷ ва нафаскашии инсонро қатъ мекарду боиси дар чанд дақиқа мурдани инсон мегардид.

Президент Доналд Трамп эълом кард, ки ба Украина низоми зиддимушакии "Патриот" мефиристанд ва маблағи онро Иттиҳоди Аврупо мепардозад. Дар ин бора хабаргузории "Ройтерс" гузориш додааст.

Ба гуфтаи Трамп, Украина барои дифои худ ба низоми “Патриот” эҳтиёҷ дорад. "Путин нарм суҳбат мекунаду бегоҳи ҳамон рӯз ҳамаро бомбаборон мекунад,"-гуфт президенти Амрико дар Вашингтон. Аммо раиси ҷумҳури Амрико нагуфт, ки ба Украина чанд низоми зиддимушакии “Патриот” медиҳанд.

Дар назар аст, ки имрӯз Доналд Трамп дар бораи ҷанги Украина “изҳороти муҳим” диҳад. Пойгоҳи Axios менависад, президенти ИМА интиқоли бастаи нави силоҳҳо ба Украина, аз ҷумла мушакҳои дурпарвозро эълон мекунад.

Ба гуфтаи манобеи ин Axios, ба Украина мушакҳое дода мешавад, ки метавонад ба дохили Русия, аз ҷумла Маскав зарба занад. Ин хабар то ҳол расман тасдиқ нашудааст.

Шаби 14-уми июн Русия бо 136 паҳпод ба Украина ҳамла кард. Ба иттилои артиши Украина, 28 паҳпод ба ҳадаф расиданд. Дар ин ҳамла низомиёни рус аз мушакҳо низ истифода кардаанд.

Дар Қазоқистон вазорати захираҳои об ба сокинон як машваратномае нашр кардааст, ки тарзи сарфаи обро нишон медиҳад. Аз ҷумла, ба сокинон тавсия мешавад, ки ба ҷои оббозии муфассал душ қабул кунанд, ҷумаки обро баста, бо об дар пиёла дандон бишӯянд.

Вазорат гуфтааст, ки машваратҳои сарфаи обро ба таври таблиғоту огаҳӣ дар кӯчаҳову хиёбонҳои кишвар ҳам паҳн хоҳанд кард. Масалан, як машварати дигар ин аст, ки мошинҳои ҷомашӯиро танҳо пур карда баъд ба кор дароранд, дар ташноб ҳам режими сарфаи обро истифода кунанд ва ҳам вазъи лӯлаҳои обро дар хона ҳамеша бисанҷанд, то ки об беҳуда сарф нашавад.

Вазорати оби Қазоқистон гуфтааст, ки дар сурати риояи ин чораҳо, дар як сол ҳар як оилаи иборат аз шаш нафар метавонад то 35 ҳазор литр об сарфа шавад.

Бо сабаби гармоиши иқлим солҳои охир Қазоқистон бо камбуди афзояндаи оби ошомиданӣ рӯбарӯ мешавад ва пешбиниҳои СММ ин аст, ки то соли 2040 хатари он вуҷуд дорад, ки дар кишвар камбуди об то 50% афзоиш ёбад.

Полис дар шимоли Тоҷикистон мардеро аз рӯи иттиҳоми ба худкушӣ расонидани ҳамсараш гумонбар эълон кардааст. Исми ин хонавода маълум нест, вале дар хабари ВКД аз рӯзи 12 июл ҷузъиёти фоҷеа дар ноҳияи Зафаробод нашр шудааст.

Бино ба ин хабар, марди 34-сола “муддати зиёд” бо ҳамсари 28-солааш ҷангу ҷанҷол намуда, ӯро ба худкушӣ расонидааст. Дар хабари расмӣ омадааст, ки “бинобар муомилаҳои бераҳмона ва ҷабру зулми шавҳараш” рӯзи 10-уми июл зан дар оғилхонаи манзили истиқоматиаш худро дор овехтааст.

Аз рӯи моддаи қисми 2 моддаи 109-и Кодекси ҷиноятии Тоҷикистон, яъне “Ба худкушӣ расондан” парвандаи ҷиноятӣ оғоз шуда тафтиш идома дорад.

Ҳодисаҳои барои ба худкушӣ расонидани ҳамсар ба ҷавобгарӣ ҷалб шудани шавҳарон дар гузашта ҳам ҷой доштааст. Моҳи ноябри соли 2024 ВКД дар бораи ҳодисаи сирко нӯшида ҷон додани зани 21-солаи сокини Истаравшан хабар дод.

Тафтиш маълум кардааст, ки ин зан пеш аз худкушӣ мавриди латукӯби бераҳмонаи ҳамсари 26-солааш қарор гирифтааст. Соли 2023 ҳам сокини Душанбе Савринисо Сафарова дар 23-солагӣ худро оташ зад ва дар паи таҳқиқ додситонӣ ҳамсари ӯро аз рӯи моддаи “ба худкушӣ расонидан” ба ҷавобгарӣ ҷалб кард.

Ҳодисаҳои аз ҷониби дигар аъзои хонавода азият шудани келинҳои хонадон ва даст ба худкушӣ задани ин занҳо ҳам бисёр рӯй додааст. Дар як ҳодисаи ахир сентябри соли 2024 додгоҳи ноҳияи Деваштич Саломат Қодироваи 49-соларо барои ба худкушӣ расонидани келинаш Мадина Маҷидова ба панҷ соли зиндон маҳкум кард.

Омори пурраи чунин ҳодисаҳо феълан маълум нест, вале соли 2023, бино ба иттилои Кумитаи занон ва оилаи Тоҷикистон, дар кишвар 413 ҳолати сӯиқасд ба ҷони худ ба қайд гирифта шудааст. Тибқи маълумоти додситонии кулли Тоҷикистон дар соли 2024 дар кишвар 259 нафар занону духтарон ба худкушӣ ва суиқасд ба он даст задаанд.

Дар гузориши Ваколатдор оид ба ҳуқуқи инсон дар Тоҷикистон гуфта шудааст, ки санҷиши ҳодисаҳои худкушӣ ва сӯиқасд ба он нишон медиҳанд, ки дар аксари ҳолатҳо сабабу шароитҳои мусоидаткунанда хусусияти якхела дошта, бештар ба муносибатҳои оилавӣ байни волидону фарзандон, муноқишаҳои ночизи оилавӣ байни зану шавҳар, вуҷуд надоштани ҳамдигарфаҳмӣ дар байни аҳли оила, сатҳи пасти зиндагӣ, бекорӣ, инчунин гирифторӣ ба бемории рӯҳӣ ва дигар бемориҳо рабт дорад.

Вазирон ва роҳбарони идораҳои давлатии Тоҷикистон дар бораи кори нимсолаашон ба хабарнигорон гузориш медиҳанд. Тибқи иттилои хабаргузории "Ховар", нишастҳои матбуотии вазорату идораҳо 21-уми июл оғоз шуда, то 8-уми август давом мекунад.

Ин нишастҳо дар ним сол як бор доир мешаванд. Хабарнигорон мегӯянд, бо мушкил шудани дастрасӣ ба иттилои расмӣ, нишастҳои хабарӣ аз камтарин имконият барои гирифтани маълумот аз шахсони аввали идораҳои давлатӣ аст.

Ташкили нишастҳои хабарӣ 18 сол пеш шуруъ шуд. Дар оғоз масъулони вазорату идораҳо ҳар се моҳ бо рӯзноманигорон вомехӯрданд. Аз соли 2011 нишастҳо дар ним сол як бор баргузор мешаванд.

Дастрасӣ ба иттилои расмӣ ва дақиқ дар Тоҷикистон мушкил аст ва чанд сол боз созмону кишварҳои ғарбӣ мақомотро барои тангтар кардани ҳалқаи озодии баён танқид мекунанд.

Бар асари бархӯрди мушаки артиши Исроил ба нуқтаи тақсими об дар урдугоҳи гурезаҳои Нусейрат дар Ғазза, дастикам 8 нафар кушта ва 17 нафар захмӣ шуданд.

Хабаргузории "Ройтерз" бо такя ба мақомоти маҳаллӣ хабар дод, ки шаш нафар аз қурбониён кӯдак ҳастанд. Вазъи бисёре аз захмиён вазнин гуфта мешавад.

Артиши Исроил гуфт, ки мушак ба сӯи як ҷангҷӯи гуруҳи "Ҷиҳоди исломӣ" партоб шуда буд, аммо "ба далели корношоямӣ" мушак чанд метр дуртар афтид. Амрико ва Иттиҳоди Аврупо гуруҳи “Ҷиҳоди исломи”-ро созмони террористӣ медонанд. Исроил гуфтааст, таҳқиқи сабабҳои ҳодиса идома дорад.

“Артиши Исроил аз ҳамагуна зараре, ки ба ғайринизомиён расонида шудааст, изҳори таассуф мекунад,”-омадааст дар изҳороти артиши Исроил.

Владимир Путин аз тасмим барои комилан даст кашидани Эрон аз ғанисозии уран пуштибонӣ кардааст. Хабаргузории Axios бо такя ба манобеаш навиштааст, изҳори назари Путин дар гуфтугӯҳои пӯшида бо ҳамтои амрикоиаш Доналд Трамп ва намояндагони Эрон садо додааст.

Ба гуфтаи ин манбаъ, Маскав ба Теҳрон тавсия додааст, ки аз ғанисозии уран пурра даст кашад ва Русия омода аст, ки урани ғанишударо аз Эрон барорад.

"Путин аз эрониҳо даъват кард, ки дар ин самт кор кунанд, то музокироти беҳтаре бо амрикоиҳо дошта бошанд. Мақомоти Эрон гуфтаанд, ки ин масъаларо баррасӣ намекунанд,"-навиштааст хабаргузорӣ.

Axios ҳамчунин гузориш додааст, ки Русия дар мазҳари ом аз ҳаққи Эрон барои ғанисозии уран пуштибонӣ мекунад, вале баъди ҷанги 12 рӯза бо Исроил, Маскав мавқеи сахтар дар пеш гирифт. Дар ниҳоят Эрон аз он ноумед шуд, ки Русия дар рӯзҳои ҷанг бо Исроил, ба ҷуз изҳоротҳои матбуотӣ ба Теҳрон ягон кумаки ҷиддӣ накард.

Мақомоти Эрон рӯзи 12-уми июл гуфтанд, ҳамагуна созиши нав бояд ҳаққи ин кишвар бар ғанисозии уранро эътироф кунад.

Президенти Амрико эълон кард, ки аз 1-уми август барои молҳои воридотӣ аз Мексика ва кишварҳои Иттиҳоди Аврупо 30 дарсад таърифа ё боҷи гумрукӣ ҷорӣ мекунад. Ин нукта дар номаи Доналд Трамп ба роҳбарони ин кишварҳо зикр шудааст.

Ҷорӣ кардани таърифаҳои нав, як бахши асосии сиёсати Трамп барои бозбинии тиҷорат бо кишварҳои хориҷӣ аст. Дар як ҳафтаи ахир, Кохи Сафед эълон кард, ки барои молҳо аз 23 кишвар, аз ҷумла Канада, Ҷопон ва Бразилия таърифаҳои нав ҷорӣ мекунад. Боҷҳои гумрукӣ аз 23 то 50 дарсад пешбинӣ шудаанд.

Доналд Трамп талаб дорад, ки Иттиҳоди Аврупо боҷи гумрукӣ барои молҳои Амрикоро бекор кунад. Урсула вон дер Лейен, раиси Кумиссиёни Аврупо, тасмими ахири Трампро барои ҳарду тараф зараровар хонда, аз иқдоми ҷавобӣ ҳушдор дод.

Доналд Трамп дар айни ҳол Мексикаро ба он муттаҳам кард, ки дар мубориза бо қочоқи маводи мухаддир ягон пешравӣ накардааст. Ҳукумати Мексика, ки 80 дарсади содироташ ба Амрико аст, таърифаҳои навро "ноодилона" хонд.

Тибқи омори Вазорати молияи Амрико, дар соли ҷории молиявӣ, боҷҳои гумрукӣ зиёда аз 100 миллиард доллар даромад овардаанд.

Идораи ҳавонавардии Ҳиндустон гузориши пешакӣ аз суқути ҳавопаймои Boeing 787 Dreamliner-ро нашр кард. Дар ин ҳодиса, ки 12-уми июни имсол рух дод, 274 кас ҳалок шуд.

Гузориш бар асоси маълумотҳои сабти парвоз ва дурбинҳои назоратӣ таҳия шудааст. Тибқи маълумоти пешакӣ, ҳавопаймо бо сабаби аз кор мондани дастгоҳи интиқоли сӯзишворӣ суқут кардааст. Ҳанӯз маълум нест, ки низоми додани сӯзишворӣ чаро аз кор мондааст.

Ба гузориши коршиносон, дастгоҳи додани сӯзишворӣ баъди парвоз дарҳол ба ҳолати "хомӯш" гузаронда шудааст. Яке аз халабонҳо ба ҳамкораш дар ин бора хабар медиҳад, аммо халабони дуввум мегӯяд, ки коре накардааст.

Дар гузориш омадааст, ки баъди 10 сония интиқоли сӯзишворӣ аз сар гирифта мешавад, ки вале яке аз муҳаррикҳо саривақт ба кор намедарояд.

Гуфта мешавад, ки вазъи саломатии ҳарду халабон пеш аз парвоз хуб буд. Суоли асосӣ дар назди тафтишот ин аст, ки чаро халабон дар қисмати муҳими парвоз, дидаву дониста интиқоли сӯзишвориро қатъ кардааст?

Ҳавопаймои навъи Boeing 787-8 Dreamliner рӯзи 12-уми июн аз Аҳмадобод ба Лондон бояд парвоз мекард, баъди чанд дақиқаи аз замин боло шудан суқут кард. Дар наворҳо дида мешавад, ки баробари ба замин бархурдан ҳавопаймо метаркад. Дар ин ҳодиса 274 кас ба ҳалокат расида, фақат як мусофир зинда монд. Ҳавопаймо ба болои бинои коллеҷи тиббӣ афтид. Дар онҷо 10 пизишк ва аъзои оилаашон ҳалок шуданд.

Намояндагони Сурия ва Исроил дар шаҳри Бокуи Озарбойҷон аз наздик вохӯрдаанд. Ба гузориши хабаргузории AFP, ин дидор дар ҷараёни сафари Аҳмад Шаръ, раиси ҷумҳури муваққати Сурия ба Озарбойҷон анҷом шудааст.

Хабаргузории AFP аз қавли манобеаш дар ҳукумати Сурия навиштааст, Аҳмад Шаръ дар вохӯрии рубарӯ бо намояндагони Исроил ширкат накардааст. Сабаб "ҷиноятҳои ҷангии ахири Исроил дар Сурия" гуфта шудааст.

Баъди суқути ҳукумати Башор Асад дар моҳи декабри соли 2024, Исроил ба маконҳои ҳарбии Сурия садҳо ҳамла анҷом дод. Исроил ҳамчунин неруҳояшро ба минтақаи бетараф бо Сурия фиристод, ки зери назорати Созмони милал буд.

Аҳмад Шаръ баъди соҳиби қудрат шудан дар Сурия, борҳо гуфтааст, ки Димишқ нияти ҷанг бо ҳамсояҳоро надорад. Аммо Исроил бо назардошти гузаштаи Аҳмад Шаръ дар гуруҳҳои террористӣ, ба ҳарфҳои ӯ нобоварӣ изҳор кардааст.

Охири моҳи июн Гидеон Саар, вазири корҳои хориҷии Исроил гуфт, кишвараш ба одисозии равобит бо Сурия ҳавасманд аст.

Ёдгориҳои мероси фарҳангии "Хуттали Қадим", ба Феҳристи мероси ҷаҳонии Созмони омӯзишӣ, илмӣ ва фарҳангии Созмони Милали Муттаҳид (ЮНЕСКО), ворид гардид.

Ба иттилои Комиссияи миллии Тоҷикистон оид ба корҳои ЮНЕСКО, ёдгориҳои мероси фарҳангии "Хуттали Қадим", рӯзи 11 июл дар ҷаласаи 47-уми Кумитаи мероси ҷаҳонӣ дар Порис -- пойтахти Фаронса, шомили ин феҳрист шуд.

Тавре Комиссияи миллии Тоҷикистон оид ба корҳои ЮНЕСКО мегӯяд, номинаи мазкур 11 ёдгориҳои бостоншиносӣ ва меъмории воқеъ дар ноҳияҳои Восеъ, Данғара, Ҷалолиддини Балхӣ, Фархор ва Ховалинги вилояти Хатлонро дар бар мегирад.

Инҳо Дайри Буддоии Аҷинатеппа, Қалъаи Ҳулбук, Шаҳристони Ҳулбук, Шаҳраки Манзаратепа, Қалъаи Золи Зард, Мақбараи Мавлоно Тоҷиддин, Шаҳраки Ҳалевард (Кофирқалъа), Шаҳристони Золи Зар, Корвонсаройи Тоҳир, Шаҳртеппа ва Дайри Буддоии Хишттеппа ҳастанд.

"Хуттали Қадим" панҷумин мавзеи Тоҷикистон аст, ки ҳамчун мероси ҷаҳонӣ муаррифӣ мешавад.

Ёдгории табиии "Боғи миллии Тоҷикистон", шаҳри бостонии Саразм, инчунин мусиқии миллии "Шашмақом", ҷашни Наврӯзи байналмилалӣ, таоми миллии "Оши палов" ва "Чакан, санъати зардӯзӣ дар Тоҷикистон", аз ҷумлаи дигар мероси фарҳангии мардуми тоҷик ба шумор мераванд, ки аз сӯи ЮНЕСКО ба Феҳристи мероси ҷаҳонии башарият ворид гардидаанд.

Дар шаҳри Душанбе Муколамаи солонаи сатҳи баланд оид ба сиёсат ва амният миёни кишварҳои Осиёи Миёна ва Иттиҳоди Аврупо, доир шудааст. Ба иттилои Вазорати корҳои хориҷии Тоҷикистон, ин ҷаласа дар сатҳи муовинони вазирони корҳои хориҷӣ, баргузор шуд.

Дафтари Намояндагии Иттиҳоди Аврупо дар Душанбе мегӯяд, ки ҳайати аврупоиро дар мулоқоти рӯзи 11 июл, Олоф Скуг, муовини Дабири кулли Хадамоти амалиёти хориҷии Аврупо, раҳбарӣ кард.

Манбаъ афзуд, дар ҷаласа роҷеъ ба масъалаҳои умумии амниятӣ ҷаҳонӣ ва минтақавӣ дар пайи таҷовузи низомии Русия ба Украина, ҳамчунин вазъият дар Ховари Миёна ва Афғонистон, баҳсҳо сурат гирифтааст.

Дар хабарномаи Дафтари Намояндагии Иттиҳоди Аврупо гуфта мешавад, ки ҷонибҳо ба мувофиқа расиданд, ки ҳамкориҳо дар бахши амниятро тақвият бахшанд ва Иттиҳоди Аврупо омодагии худро барои пуштибонӣ аз ин талошҳо эълон кардааст.

Мубориза бо терроризм ва ифротгароӣ, идоракунии марз ва қочоқи маводи мухаддир, инчунин идоракунии об, аз дигар масъалаҳои мавриди баррасии ин ҷаласа будааст.

Иттиҳоди Аврупо бо 27 кишвари узв бузургтарин сармоягузори хориҷӣ дар Осиёи Марказӣ мебошад. Иттиҳоди Аврупо ва панҷ кишвари минтақа дар соли 2023 харитаи роҳро барои густариши робитаҳояшон имзо карданд. Дар пайи он дар соли 2024 нишасти сармоягузорон баргузор шуд. Иттиҳоди Аврупо ваъда дод, ки ба роҳи тиҷоратии “Долони Миёна” 10 миллиард евро (10,8 миллиард доллар) сарф мекунад.

Дар авоили моҳи апрели соли ҷорӣ дар шаҳри Самарқанд нишасти аввалини сарони Осиёи Марказӣ ва Иттиҳоди Аврупо баргузор шуд ва бар асоси матни эъломияи он, Аврупо сармоягузориҳои навро дар минтақа дар назар дорад ва ҳадафаш ҳарчи зичтар кардани робитаи Брюссел бо кишварҳои Осиёи Миёна аст.

Дар минтақаи Красноярски Русия корманди пулисро дар фурӯши маълумот дар бораи муҳоҷирон, гумонбар медонанд.

Бино ба хабарҳои расмӣ, Кумитаи тафтишот дар ноҳияи Советскийи минтақаи Красноярск ва ҳам Ҷумҳурии Хакасия, алайҳи чор корманди пулис парвандаи ҷиноӣ боз кардааст. Ин афрод дар бахши кор бо муҳоҷират дар Красноярск кор мекарданд. Исми ин кормандони пулис нашр нашудааст.

Дар хабар гуфта шудааст, ки ин афрод ба хотири "манфиатҳои ғаразнок", аз мақом суистифода кардаанд.

Аз ҷумла, дар давоми солҳои 2021 то 2024 ин нозирони пулис бо истифода аз захираи иттилоотӣ дар компютерҳои кориашон маълумот дар бораи муҳоҷиронро нусхабардорӣ карда, иттилоот дар бораи шиносномаҳо, ҷойи кор ва ҳолатҳои вайрон кардани қонунҳои маъмуриро дар ихтиёри шахси дигар гузоштаанд.

Он нафар як сокини Красноярск буд, ки бар иваз ба ходимони пулис маблағ ва дигар хадамотро пешкаш мекард ва худаш маълумот дар бораи муҳоҷиронро бо мақсади ташкили ҳузури ғайриқонунии онҳо дар Русия ба кор мебурд.

Чор пулиси гумонбар дар ташкили ин тиҷорати сиёҳ боздошт шудаанд ва тафтишот бояд дар бораи чораҳои зидди онҳо қарор қабул кунад.

Феълан ҷузъиёти дигар дар даст нест. Ҳамчуни маълум нест чӣ миқдор аз муҳоҷирони корӣ аз дасти ин гурӯҳ зарар дидааст.